Tuladha geguritan

UMBUL JALATUNDHA

Umbul jalatundha

Banyumu kang bening kindong-kindong

Nambahi rasa seger wong kang padha ceciblon

Mbuyarake sirah kang rinasa cekot-cekot

Umbul jalatundha

Banyumu kang obah serta kimplah-kimplah

Migunani marang sawijining gotrah

Kang sesuci sumedya jiarah

Umbul jalatundha

Jebol ing jeromu ana

Sompil papak kanggo tamba

Tinemu watu tapak bima

Tuladha geguritan

MALEM GANJIL

Dening: joko HN

Kabeh padha menekung ing punjure urip

Embuh apa sing diucapke sajroning ati

Malem ganjil, sing dadi seksining alam

Aja selak apa kandane suara-suara

Pilih sugih apa mlarat, pilih luwe apa wareg,

Pilih sara apa mulya,pilih ayu apa elek

Pilih pangkat apa drajat,pilih mati apa urip

Pilih donya apa akerat

Kabeh suara-suara keprungu ing langit

Ora ana kang bisa nutup-nutupi

Ora ana kang nalang-alangi

Ora ana kang gandoli

Ngucapa,ngucapa,ngucapa

Jujura,jujura,jujura

Elinga,elinga,elinga

Sapa sira sejatine

Tuladha geguritan

KEMBANG-KEMBANG ADENIUM

Dining: Joko HN

Saben esuk, disawang

Yen awan cahyane srengenge ora kurang

Wyah sore, dielus-elus kembange

Abo endahe ya uripe

Wengi, cahyane lintang sumilat

Kembang-kembang adenium tambah eseme

Rasane kaya ngawe-awe,aja turu disik

Ayo ngeling-eling lelakon bebarengan

Nanging raga wis ora kuat

Sedina muput mung bingung golek upa

Lali sapa sing nandur kembang

Lali sapa sejatine awake dewe

Nalikane terompet maut keprungu

Kembang-kembang adenium dadi layu

Luh tumetes saka mripat kang nyawang

Lan, ora ana sing bakal ngancani meneh

Geguritan

SUKMA LELANA GUGAT

Angin kang mabur kekiteran ing dhuwur samodra

Sesat tanpa leren ngobahake banyu

Iwak gedhe iwak cilik padha gumregah

Jumedhul sakdhuwure ombak

Ilang suwara mlebu ing akasa

Prau-prau lelangen nguyak playune angen-angen

Kanthi jala lan jarring saka sutra

Obor tathit lan lintang

Sambung sinambung ing wewangunan jagad

Tapake iseh katon cetha ing garis tangan

Prasetya lan prasapa ngumbara

Dadi omah urang lan kewan segara liyane

Lumaku manut ilining pasir

Molah malih njupuk warna cahyaning jaman

Wit-witan gedhe ngadeg pating jenggeleg tanpa oyot

Angin lagi thawaf

Ngubengi kedhaton napas

Geguritan

Wayah Esuk Pedut Angendanu

Dening : Maymintaraga

rong puluh tahun kepungkur aku lan sliramu nate mlaku ana dalan kene
saklawase ora nate ketemu
saliramu lan saliraku wus beda ora kaya biyen nalika isih tak kanthi
gandaning wengi mau isih sumrebak ngebaki pedut wayah esuk

wus aja mbok tangisi lakon kang wus kapungkur
wus pirang wayah ketiga tak lakoni nganti rambut warna ireng lan putih
ing dalan iki rong puluh tahun kepungkur
ana cerita rinajut endah

dik, kala kala sliramu isih dadi impenku
pirsanana ana nduwur kae
ana teja manther ing sela-selaning gegodongan
lan lintang panjer wengi sing isih kari sakmenir gedhene

saiki aku lan sliramu linambaran rasa kangen
simpenen kangenmu ana impen